Gikuwestiyon ni House Prosecutor ug Bicol Saro Party-list Representative Terry Ridon ang paghulagway ni Vice President Sara Duterte sa iyang pagkinabuhi nga simple, human hisgoti ang dagkong transaksiyon gamit ang iyang credit card sa impeachment trial niadtong Biyernes.
Sumala kang Ridon, mokabat sa kapin P200,000 ang pipila sa mga gastohan sa pagpamalit ug pagkaon sa Japan.
Nangomedya pa siya nga karon pa niya nahibaw-an nga mahimong moabot sa maong kantidad ang pagkaon sama sa tuna sashimi ug California maki.
Gilangkit ni Ridon ang maong mga pagpalit sa pahayag ni Duterte kalabot sa iyang ‘no-gift policy’, nga gigamit niini sa pagsalikway sa mga alegasyon ni Rodulfo Gracioso Jr. nga matod pa naghatod og mga maleta nga puno sa kwarta ngadto sa Bise Presidente.
Dugang pa ni Ridon nga nagpakita ang maong mga transaksiyon nga posibleng mogamit si Duterte og credit card imbes nga modawat og mga regalo.
