Gideklara sa Malacañang ang Mayo 27, 2026 isip regular holiday sa tibuok nasud isip pagsaulog sa Eid’l Adha o ang Feast of Sacrifice alang sa mga Muslim.
Gipirmahan ni Acting Executive Secretary Ralph Recto, pinaagi sa awtoridad ni Presidente Ferdinand Marcos Jr., ang Proclamation No. 1264 nga nagtumong sa paghatag sa mga Muslim og higayon sa pagsaulog sa importanteng okasyon.
Ang Eid’l Adha, nailhan usab nga Feast of Sacrifice, nagsaulog sa pagkamaunongon ni Ibrahim sa Diyos sa dihang gisugo siya sa paghalad sa iyang anak isip pagtuman sa balaang sugo.
Sumala sa proklamasyon, girekomenda sa National Commission on Muslim Filipinos ang pagdeklarar sa holiday base sa gipaabot nga petsa sa Eid’l Adha nga mao ang Mayo 27, sumala sa Islamic lunar calendar.
Ubos sa balaod, ang regular holidays adunay katumbas nga holiday pay para sa mga empleyado nga mo-report sa trabaho sa maong adlaw.
