Gikumpirma sa Department of Justice (DOJ) nga nagsumite na kini og hangyo alang sa Red Notice ngadto sa Interpol batok kang Sen. Ronald “Bato” Dela Rosa.
Sumala sa DOJ, kini kabahin sa legal nga proseso aron ipatuman ang arrest warrant nga gi-isyu sa International Criminal Court (ICC) kalabot sa mga kaso sa ‘ crimes against humanity’ nga may kalabutan sa kampanya sa ‘war on drugs’ sa kanhing administrasyon.
Giingon usab sa DOJ nga si Dela Rosa giisip na karon nga usa ka “fugitive from justice” ug gimandoan ang mga ahensya sa pagpatuman sa balaod sama sa Philippine National Police (PNP) ug National Bureau of Investigation (NBI) nga ipatuman ang pag-aresto.
Dugang nga gipasabot sa ahensya nga ang Red Notice dili usa ka arrest warrant mismo, apan usa ka internasyonal nga alerto aron masubay ug posible nga madakpan ang usa ka tawo nga nag-atubang og seryosong mga kaso.
Nagpasidaan usab ang DOJ batok sa bisan kinsa nga giingong mosulay sa pagtabang sa pagtago sa senador.
Angayan nga matikdan nga ang Korte Suprema nagpagawas na og desisyon nga nagbasura sa petisyon alang sa temporary restraining order (TRO) nga gisang-at sa kampo sa senador, nga nagtinguha nga mapugngan ang iyang pag-aresto sa ICC.
Sa pagkakaron, wala pa mahibaluan ang nahimutangan sa senador, human siya mibiya sa Senado niadtong Mayo 14 sa kaadlawon, human sa kagubot sa Senado niadtong Mayo 13.
