Mihangyo ang kampo ni kanhi Presidente Rodrigo Duterte sa International Criminal Court (ICC) nga dili magtakda og petsa sa iyang husay tungod sa giingong nagkagrabe nga panglawas niini.
Sa usa ka 14 ka pahina nga dokumento nga gipetsahan Mayo 15, ang abogado ni Duterte nga si Peter Haynes, miinsistir nga ang ” fitness to stand trial” sa kanhi presidente kinahanglan nga susihon pag-usab sa dili pa ipadayon ang bisan unsang husay.
Sumala sa depensa, ang kondisyon sa neurological ni Duterte nagkagrabe, nga giingong nakaapekto sa iyang memorya, pangatarungan, ug abilidad sa pag-concentrate, nga mahimong makababag sa iyang aktibong partisipasyon sa husay.
Kung si Duterte makita nga ‘fit to stand trial’ ang depensa nangayo usab og dugang nga panahon sa pagpangandam alang sa husay. Namatikdan nila nga sa ubang mga kaso sa ICC, mokabat og sobra sa usa ka tuig aron magsugod ang husay mismo human makumpirma ang mga kaso batok sa mga akusado.
Gusto usab sa depensa nga limitahan ang paggamit sa video testimonya ug sinulat nga mga pahayag isip ebidensya. Sumala kanila, importante nga ang mga saksi motambong ug motestigo sa personal aron mapadayon ang patas nga husay.
Samtang, gihangyo usab sa kampo ni Duterte nga ang Ingles ang himuong pangunang pinulongan sa mga proseso, samtang kinahanglan usab nga adunay interpretasyon sa Cebuano aron ang kanhi presidente makasunod sa mga hearing.
Niadtong Abril 23, gikumpirma sa ICC Pre-Trial Chamber I ang mga akusasyon sa krimen batok sa katawhan batok kang Duterte nga may kalabotan sa gubat sa droga sa iyang administrasyon.
Ang unang status conference gikatakda nga ipahigayon sa Mayo 27.
