Gipatutsadahan ni Senate President Alan Peter Cayetano ang minorya sa Senado kabahin sa mga batikos batok sa iyang pagpangulo.
Sa press conference niadtong Biyernes, Mayo 15, 2026, gipasiugda ni Cayetano nga murag mas naka-focus umano ang bag-ong minorya sa 2028 National Elections kaysa sa kasamtangang trabaho sa Senado.
“Kayo sa Minority, mas importante sa inyo ang 2028 [elections]… ang Senate presidency?” matod ni Cayetano.
Gipanghimakak usab niya ang alegasyon nga nahimong gubot umano ang Senado sukad nga siya milingkod isip lider sa kapulungan.
“You’re willing to see the Senate that way, and you’re willing to join the narrative, to flip the narrative to say, ‘Since I got here, magulo na ang Senate,’” dugang pa niya.
“Kailan naging crime ang maging Senate president?” matod pa ni Cayetano.
Niadtong Lunes, Mayo 11, nahitabo ang Senate coup nga gipangulohan sa Duterte bloc nga kabahin si Cayetano, nga misangpot sa pagpahawa kang Sen. Tito Sotto III isip Senate President.
Sa botong 13-9, nakuha ni Cayetano ang liderato sa Senado, samtang nag-abstain sila Sen. JV Ejercito ug Sen. Migz Zubiri.
Human sa reorganisasyon, gideklarang bakante ang tanang posisyon sa Senado, lakip ang mga committee chairmanships, nga maoy hinungdan sa pagkansela sa pipila ka mga hearing sa komite.
Si Cayetano na karon ang ikatulong Senate President sukad sa pag-abri sa 20th Congress niadtong 2025.
Mahinumduman nga si Sen. Chiz Escudero ang unang Senate President sa 20th Congress sa wala pa siya mapahawa human sa kudeta nga kaniadto gipangulohan sa paksyon ni Sotto.
Nahitabo usab ang kontrobersiya sa paglingkod ni Cayetano isip Senate President human sa giingong insidente sa pinusilay tali sa Office of the Sergeant-at-Arms (OSAA) ug mga operatiba sa National Bureau of Investigation (NBI) may kalabotan sa gipaabot nga pagdakop kang Sen. Ronald “Bato” dela Rosa niadtong Miyerkules, Mayo 13.
