GENSAN – Posibleng ihunong sa mga transport cooperative ang service contracting program kon dili pa mahatag karong semanaha ang payout nga budget gikan sa gobyerno.
Matud ni Orly Sabelita, chairman sa Gensan Transport Cooperative, nga nagkanayon nga wala silay problema bisan unsa pa kadugay ipadayon sa gobyerno ang maong programa basta lamang masiguro nga regular ug matag semana mahatag ang bayad alang sa ilang operasyon.
Dugang pa ni Sabelita, dako na kaayo ang epekto sa nalangan nga payout sa mga drayber ug operators nga nagsalig sa maong programa isip dugang tabang sa ilang panginabuhi ug adlaw-adlaw nga gasto sa pasada.
Nanawagan usab siya sa gobyerno nga papaspason ang rollout sa mga subsidiya alang sa transport sector ug tumanon ang ubang mga saad nga hangtod karon wala pa mahatag sa mga miyembro sa transport cooperative.
Dugang pa niya, importante nga malikayan ang dugang kalisod sa mga public transport drivers ilabina karon nga nagpadayon ang pagsaka sa presyo sa mga palaliton ug gasto sa operasyon.
