GENSAN- Nagpahimangno si Dr. Karl Igrobay, Assistant Department Head sa City Health Office, mahitungod sa risgo sa “heat stroke” ug “heat exhaustion,” ilabi na sa mga tricycle driver nga pirmi nakabulad sa init nga panahon.
Sumala kang Dr. Igrobay, importante nga likayan ang direkta nga pagkabulad sa kainit sa adlaw. Matod pa niya, mas maayo nga mangitag landong o “shaded area” aron didto magpahulay o magtambay kung walay pasahero, aron maminusan ang “exposure” sa init.
Giingon usab niya nga kon dili malikayan ang pagbiyahe ilabina sa udto, kinahanglan pirming mag-inom og tubig.
Girekomenda niya nga dili lang 8 hangtod 10 ka baso kada adlaw, kundili molapas pa sa 12 ka baso kon mahimo aron malikayan ang dehydration.
Gisugyot usab niya nga mas maayong magsul-ob og luag ug “cotton” nga sinina tungod kay makatabang kini sa pag-agi sa hangin ug makapabugnaw sa lawas.
Likayan ang mga sinina nga makapugong sa sirkulasyon sa hangin kay makadugang kini sa risgo sa heat exhaustion.
Dugang pa, girekomenda usab ang paggamit og proteksyon sama sa kalo aron mapanalipdan ang ulo ug nawong sa direktang silaw sa adlaw, ug tinted sunglasses aron maprotektahan ang mata.
Matod sa doktor, kining mga yano nga pamaagi makatabang sa paglikay sa seryosong epekto sa grabeng kainit nga kasagaran maeksperyensyahan sa mga nagtrabaho sa gawas sama sa mga tricycle driver.
