SARANGANI- Gipahibalo sa lokal nga panggamhanan sa Sarangani Province ang pagbag-o sa pamaagi sa selebrasyon sa SarBay Fest karong tuiga, isip tubag sa nagkataas nga presyo sa mga palaliton ug epekto sa global nga tensyon.
Sumala sa opisyal nga pahayag, dili una magpahigayon og dagkong beach party ug wala usab sa plano ang pag-imbitar og mga iladong national artists ug banda. Gipasiugda usab nga walay ipatindog nga dako nga entablado o grand production.
Matud pa sa mga organizers, mas gipili nila ang mas yano apan mas makahuluganon nga selebrasyon aron matutokan ang kaayohan sa mga lumulupyo, ilabi na sa mga mananagat ug mag-uuma nga giila isip “SarBay Heroes.”
Bisan pa niini, klaro nga dili kanselado ang SarBay Fest.
Hinuon, ilisan lamang ang porma niini pinaagi sa pagpalig-on sa kampanya nga “I Love Clean SarBay,” nga naglakip sa coastal clean-up, pagpanalipod sa kinaiyahan, ug pagpreserba sa bahandi sa kadagatan sa probinsya.
Gilauman nga pinaagi sa maong lakang, mapalig-on ang panaghiusa sa komunidad ug mapadayon ang responsableng pagdumala sa kinaiyahan. Ang selebrasyon sa SarBay Fest gikatakdang ipahigayon sa Mayo 22 karong tuiga.
