Dungan sa pagsaulog sa Semana Santa, giawhag ni President Ferdinand Bongbong Marcos Jr. ang katawhang Pilipino sa pagpamalandong ug pagbag-o sa ilang dedikasyon sa pagtuo, pag-alagad, ug gugma alang sa uban.
Gikumpirma usab sa hepe ehekutibo niadtong Martes nga mobalik siya sa iyang probinsya sa Ilocos Norte aron didto igugol ang bililhong mga adlaw.
Wala na mohatag og dugang detalye ang Presidente bahin sa iyang piho nga mga kalihokan alang sa Panahon sa Kwaresma.
Sa iyang inisyal nga mensahe, gipasiugda ni Marcos ang kamahinungdanon sa pag-atiman ug pagserbisyo sa nasud.
Gipahayag usab sa Presidente ang iyang pakighiusa sa mga Pilipino nga naggahin og panahon sa pag-ampo ug paghinumdom sa pag-antos ni Hesukristo.
Nanawagan siya sa publiko nga madasig sa ehemplo sa pagkamapaubsanon ug paglaum nga gipakita ni Kristo aron mapalig-on pa ang gugma ug pagserbisyo sa katilingban.
