Imbestigahan sa House of Representatives kung nganong ang Pilipinas ang labing naapektuhan sa global oil shock, ilabina ang diesel, nga mao ang pangunang gasolina sa sektor sa transportasyon, mga mananagat, ug mga mag-uuma.
Kagahapong adlawa, gipahibalo ni Mamamayang Liberal (ML) party-list Rep. Leila de Lima nga iyang gisang-at ang House Resolution (HR) 914 aron imbestigahan nganong taas kaayo ang presyo sa diesel sa Pilipinas kon itandi sa ubang mga nasud, ilabina sa Asia-Pacific Region.
Giingon sa magbabalaod niadtong Marso 23, 2026, ang presyo sa diesel sa nasud miabot sa P102.60 kada litro, halos doble sa P56.50 kada litro sa wala pa magsugod ang gubat sa Iran nga hinungdan sa global oil shock.
Matod niya, layo ra kini sa nag-unang presyo sa rehiyon sa Asia-Pacific bisan pa man nga parehas ra ang presyo sa pagpalit sa nahisgutang produkto sa merkado sa kalibutan, busa matod niya nga angay kining imbestigahan.
