GENSAN- Gipasabot ni Orly Sabelita, General Manager sa Metro Gensan Transport Cooperative, nga ang hinungdan sa kalangan sa fuel subsidy mao ang hinay ug “reactive” nga aksyon sa nasyonal nga gobyerno taliwala sa krisis sa lana.
Matud pa niya, bisan pa man og kompleto na ang ilang gisumite nga mga dokumento ug gipasaligan sila sa LTFRB nga i-rollout ang ayuda niadtong milabayng Miyerkules human kini ma-download sa Landbank, wala gihapoy nadawat nga piso ang ilang sektor.
Gikataho ni Sabelita nga kaniadto moabot lang og usa ka semana ang pagproseso niini apan karon giingong tulo na ka semana ang milabay sukad sa pagsugod sa gubat sa Ukraine ug Russia nga maoy nagpataas sa presyo sa lana ngadto sa $120 matag bariles ug wala gihapon ang maong budgeted nga subsidy.
Matud pa sa transport group, dako kaayog epekto kini sa ilang mga drayber nga naglisod na sa adlaw-adlaw nga gasto tungod sa sunod-sunod nga pagtaas sa presyo sa gasolina.
