Daghan ang nangutana karon sa kalit nga pagsaka sa presyo sa petrolyo sa mga gasoline station dinhi sa dakbayan sa Heneral Santos.
Matud ni Jordan Ferrer, usa ka gasoline station crew, halos matag adlaw adunay mga motorista nga mangutana ngano nga nisaka pag-usab ang presyo sa lana. Sumala kaniya, kasagaran sa iyang ginahatag nga tubag mao nga adunay nagpadayon nga tensyon sa Middle East, nga nakaapekto sa suplay ug presyo sa petrolyo sa tibuok kalibutan.
Gipasabot ni Ferrer nga bisan dili direktang apektado ang Pilipinas sa maong sitwasyon, modangat gihapon ang epekto niini sa lokal nga merkado tungod kay ang nasud nagasalig sa imported nga petrolyo.
Dugang pa niini, miingon si Ferrer nga mas maayo pa alang kaniya nga mosaka na lang ang presyo sa petrolyo kaysa adunay mahitabo nga gubat sa usa ka nasud. Matud pa niya, mas dako ug mas grabe ang mahimong epekto sa ekonomiya ug sa kinabuhi sa mga tawo kon mosamot pa ang kagubot sa nasabing rehiyon.
Sa pagkakaron, padayon gihapon ang pagmonitor sa mga otoridad ug sa sektor sa enerhiya sa kalihukan sa presyo sa petrolyo sa world market, ilabina sa epekto sa nagpadayon nga tensyon sa Middle East nga maoy usa sa mga dakong tinubdan sa suplay sa lana sa kalibutan
