GENSAN- Gimandoan sa Office of Civil Defense (OCD) ang tanang Local Disaster Risk Reduction and Management Councils (LDRRMCs) sa matag local government unit sa Region 12 nga i-activate ang ilang tagsa-tagsa ka monitoring systems tungod sa nagpadayon nga grabeng panahon.
Kini human sa mga pag-ulan nga nasinati kagabii sa pipila ka bahin sa SOCCSKSARGEN nga gipahinabo sa easterlies o init nga hangin gikan sa Pacific Ocean nga nagdala og baga nga mga panganod ug ulan.
Sumala ni Beverly Ann Santos, Information Officer sa OCD Region 12, ang tanang LDRRMCs hugot nga gipahinumdoman sa pagmonitor sa sitwasyon sa ilang mga hurisdiksyon, ilabi na sa mga lugar nga daling mabahaan ug madahili ang yuta.
Gitambagan usab ang mga lokal nga gobyerno nga andam alang sa dali nga pagtubag kung ang mga residente nanginahanglan og tabang o dali nga pagbakwit.
Gipasalig sa OCD nga ang 24/7 Operations Center niini alerto aron magmonitor ug maghatag og angay nga suporta sa mga apektadong lugar kung gikinahanglan.
