Mopalig-on ang Philippine National Police (PNP) sa ilang information drive batok sa pagbaligya og smuggled ug ilegal nga sigarilyo sa mga sari-sari store sa tibuok nasud.
Gimandoan ni PNP Chief Jose Melencio Nartatez Jr. ang tanang hepe sa pulis nga makig-alayon sa mga lokal ug barangay nga mga opisyal aron mapalig-on ang kampanya sa pagpakatap sa impormasyon, human sa mga report nga ang mga smuggled nga sigarilyo gibaligya sa gagmay nga mga tindahan.
Si Nartatez miingon nga ang mga tag-iya sa gagmay nga tindahan kinahanglan nga masabtan nga sila nahimong kabahin sa supply network sa mga sindikato kung mouyon sila sa pagbaligya sa maong mga produkto.
Ang information drive maglakip sa pag-ila sa mga brand sa smuggled ug ilegal nga sigarilyo aron magsilbing giya sa mga vendor ug mga pumapalit.
Kahinumduman nga si Interior Secretary Junvic Remulla kaniadto nagpasidaan nga ang mga awtoridad mohimo og mga pag-raid sa mga merkado publiko ug gagmay nga mga retailer isip kabahin sa kampanya batok sa ilegal nga sigarilyo. Niining bahina, ang mga namaligya gihatagan og usa ka semana nga lugway aron ihunong ang pag-apod-apod ug ibaligya ang ilang mga baligya sa dili pa magsugod ang mas estrikto nga operasyon.
Samtang, nanawagan ang PNP sa publiko, labi na ang gagmay nga mga tindahan, nga mokooperar ug dayon ireport sa mga awtoridad ang bisan unsang impormasyon bahin sa pagbaligya og smuggled nga sigarilyo sa ilang lugar.
