Moabot sa 12 ka sesyon ang gikatakda sa sunod semana alang sa ‘confirmation of charges’ nga giatubang ni kanhi Presidente Rodrigo Duterte sa iyang kaso nga ‘crimes against humanity’ sa International Criminal Court (ICC).
Ang husay gikatakda nga molungtad og upat ka adlaw: Pebrero 23 – 24, ug Pebrero 26 – 27.
Matag adlaw adunay tulo ka sesyon: ang unang sesyon sa Pebrero 23 gikan sa alas 5 hangtod alas 6 sa hapon, oras sa Pilipinas. Kini sundan sa laing sesyon gikan sa alas 6:30 hangtod alas 7:30 sa gabii ug ang katapusang sesyon gikan sa alas 9 hangtod alas 10 sa gabii.
Ang parehas nga iskedyul ang sundon sa nahabilin nga tulo ka adlaw sa husay.
Sa pagkumpirma sa mga kaso, ang ICC ang motino kung adunay igo nga ebidensya batok sa kanhi presidente sa iyang kaso nga ‘ crimes against humanity’
Dinhi, ang Prosecution, Defense, ug ang Legal Representatives of Victims mopresentar sa ilang tagsa-tagsa ka oral submissions ngadto sa mga maghuhukom sa ICC aron depensahan ang ilang tagsa-tagsa ka argumento.
Ang hearing gikatakda unta niadtong Septiyembre 23 2025 apan nalangan tungod sa sunod-sunod nga mga petisyon nga gisang-at sa kampo sa kanhi presidente.
