Gideklara ni Mayor Jasper Que ang tibuok lungsod sa Bongao Tawi-tawi ubos sa State of Calamity human hapit 1,000 ka mga balay sa usa ka residential area ang nasunog niadtong Martes, Pebrero 3.
Sumala sa report, 690 ka pamilya ang nawad-an og balay, apan walay gitaho nga namatay o nasamdan.
Ang kinatibuk-ang kadaot sa mga pribadong propiedad gibanabana nga moabot sa P17.5 milyon ug sa mga pampublikong propiedad nga moabot sa P18 milyon.
Base sa resolusyon sa munisipyo, 30% sa Quick-Response Fund (QRF) sa lungsod ang igahin aron matabangan ang mga apektadong pamilya.
Samtang, si Fire Inspector Wagner Kamlian, acting Municipal Fire Marshall sa Bureau of Fire Protection Bongao Central Fire Station, miingon nga ang imbestigasyon sa hinungdan sa sunog nagpadayon.
Sa managlahing report gikan sa lokal nga panggamhanan sa Bongao, ang opisina ni Tawi-Tawi Gob. Ysmael Sali ug Bangsamoro Social Services Minister Raissa Jajurie, ang mga residente sa Barangay Lamion nga nawad-an sa ilang mga balay tungod sa sunog anaa na karon sa mga evacuation sites, ang uban kanila anaa sa kampus sa Mindanao State University.
