Angay nga mubalik sa Pilipinas si kanhi Ako Bicol Partylist Rep. Zaldy Co kon seryoso siya sa pagtestigo sa impeachment complaint nga gisang-at batok kang Presidente Ferdinand Marcos Jr.
Sumala sa House Committee on Justice Chairperson nga si Gerville Luistro, samtang katungod sa bisan kinsa ang pagtestigo, ang mga lagda sa komite kinahanglan sundon.
Gipasiugda ni Luistro nga ang saksi kinahanglan nga “nanumpa” ug motambong sa personal atol sa hearing tungod kay ang pagtestigo pinaagi sa teleconferencing o digital nga paagi dili gitugotan ubos sa mga lagda sa House.
Si Co, kinsa gikataho nga naa sa Portugal, nag-atubang og arrest warrant kalabot sa usa ka anomalous nga flood control project sa Oriental Mindoro.
Sumala ni Luistro, bisan kung siya giisip nga usa ka pugante, dili pa sigurado kung si Co na-disqualify isip saksi, apan kinahanglan niyang atubangon ang risgo sa pag-aresto sa higayon nga mobalik siya sa nasud aron motestigo atubangan sa komite.
