Gipasalig ni Senador Sherwin Gatchalian nga ang pagtukod og mga classroom mapadali ubos sa 2026 national budget.
Sumala sa enrolled budget measure, P85 bilyon ang gigahin alang sa pagtukod ug rehabilitasyon sa mga classroom.
Sa maong kantidad, dako nga bahin ang gigahin alang sa pagtukod, pag-ilis, ug pagkompleto sa mga bilding gikan sa kindergarten hangtod sa sekondarya, ingon man sa mga tech-voc laboratories.
Gipasiugda ni Gatchalian nga dili lang mas dako nga pundo ang gigahin apan mas paspas usab ang pagpatuman niini uban sa tabang sa nagkalain-laing sektor.
Ang badyet naghatag sa Department of Education (DepEd) og kagawasan sa pagpili sa mga pamaagi sa pagtukod, lakip na ang public-private partnerships.
Mahimo usab nga mosulod ang DepEd sa mga MOA uban sa Department of Public Works and Highways (DPWH), mga kwalipikado nga LGU, CSO, NGO, ug AFP Corps of Engineers.
Ang tumong niini nga lakang mao ang dungan nga pagpatuman sa mga proyekto sa lain-laing bahin sa nasud aron matubag ang backlog sa mga pasilidad sa edukasyon.
