GENSAN– Padayon ang kampanya sa Police Regional Office 12 (PRO-12) batok sa cigarettes smuggling sa rehiyon. Sumala ni PBrig. Gen. Arnold Ardiente, Regional Director sa PRO-12, wala mohunong ang mga otoridad sa pagdakop sa mga indibidwal nga nalambigit sa ilegal nga pagpalusot sa sigarilyo, bisan gamay o dagko pa ang kantidad nga makumpiska.
Matud pa ni Ardiente, adunay mga bodega na usab nga nadiskobre ug nasakpan nga gigamit sa pagtipig sa mga smuggled nga sigarilyo, ilabi na sa mga dapit nga giisip nga strategic sa operasyon sa mga smuggler.
Hugot usab ang ginahimong monitoring sa mga baybayon, nga giila nga alternatibong ruta sa mga smuggler tungod kay hugot na kaayo ang mga checkpoints sa mga kadalanan. Tungod niini, mas gipunting sa kapulisan ang pagpatrolya sa baybayon aron mapugngan ang ilegal nga kalihokan.
Sa pagkakaron, partikular nga ginamonitor ang baybayon sa Lebak, Kalamansig og Palembang sa Sultan Kudarat, diin padayon ang koordinasyon tali sa kapulisan, LGU, ug uban pang ahensya sa gobyerno sa maong lugar aron mapalig-on ang kampanya batok sa ilegal nga sigarilyo.
