GENSAN – Gibutyag ni Atty. Rogelio Garcia nga ang Independent Commission for Infrastructure (ICI) sa pagkakaron wala’y igo nga gahum aron epektibong mag-imbestiga sa mga alegasyon, lakip na ang kontrobersyal nga flood control scandal.
Sumala pa sa abogado kini ang rason niya nakit-an niya nga duha na sa ICI Commissioner ang miresign nga ang ulahi mao si Rosanna Fajardo.
Gibutyag ni Atty. Garcia nga kadtong mga tawo nga gi-subpoena sa ICI kay maminaw lang ug mamati sa mga alegasyon, apan dili mapugos sa paghatag og ensaktong impormasyon.
Daghang bisita nga gipatawag sa ICI ang nangayo og executive privilege, busa walay klarong testimonya nga masaligan. Dugang pa ni Atty.Garcia nga wala usab gipahigayon ang judicial affidavit, nga kasagarang gigamit sa korte aron masiguro ang lig-on nga ebidensya.
Sa pamahayag pa sa nasampit, ang referral sa ICI ngadto sa Ombudsman kay dili usab lig-on kay narrative ra sa istorya, wala’y sumbanan o dokumentadong ebidensya.
Kung ang DOJ o Ombudsman ang mag-imbestiga, sila lang gihapon ang maningkamot nga makakuha og ensaktong impormasyon. Busa, wala’y rason nga magpadayon pa ang ICI kung walay epektibong kapasidad sa imbestigasyon.
Dili usab mapugos ang mga opisyal sama nila Fajardo ug Singson nga motubag og klaro sa ilang mandato.
