Makaangkon na og dugang nga suhulan ang mga minimum wage earner sa mga pribadong kompanya sa SOCCSKSARGEN Region, human aprobahan ang bag-ong wage order sa Regional Tripartite Wages and Productivity Board (RTWPB-12).
Ang pagpatuman sa maong usbaw sa sweldo himuon sa duha ka tranche. Ang unang tranche ipatuman karong Nobyembre, samtang ang ikaduhang tranche ipahigayon sa Disyembre 2025.
Sa ilawom sa Non-Agriculture/Retail/Service sector, adunay P30 nga dugang sa suhulan. Gikan sa kasamtangang P430.00, mahimo kining P450.00 sa Nobyembre, ug mosaka pa ngadto sa P460.00 sa Disyembre.
Samtang sa Agriculture sector, adunay P33 nga dugang. Gikan sa P410.00, mahimo kining P433.00 sa Nobyembre ug P443.00 sa Disyembre sa ikaduhang tranche.
Gawas niini, may usbaw usab sa sweldo sa mga kasambahay sa rehiyon. Alang sa mga nagtrabaho sa syudad ug first-class municipalities, adunay P1,000 nga dugang, busa gikan sa P5,000.00, mahimong P6,000.00 na ang ilang buwanang sweldo.
Alang usab sa mga kasambahay nga anaa sa uban pang mga munisipyo, adunay P1,500 nga dugang gikan sa P4,500.00, busa mahimong P6,000.00 na usab ang ilang madawat kada bulan.
Ang RTWPB-12 nagpasabot nga ang maong pagtaas sa suweldo nagtinguha nga matabangan ang mga trabahante nga makasunod sa pagsaka sa presyo sa mga palaliton ug makab-ot ang mas hapsay nga kahimtang sa panginabuhi sa rehiyon.
