Gi-deactivate ni Shuvee Etrata ang iyang opisyal X (kanhi Twitter) account pipila ka mga adlaw human siya gisaway tungod sa usa ka video diin siya mipadayag og simpatiya kang kanhi Presidente Rodrigo Duterte.
Sukad niadtong Domingo, September 28, wala na ma-access sa mga netizens ang iyang X page. Hinuon, nagpabilin siyang aktibo sa Instagram, diin iyang gipaambit ang mga highlight sa iyang mga kalihokan kaniadtong Sabado, Setyembre 27, nga adunay caption nga: “Padayon lang ta”.
Nagsugod ang kontrobersiya dihang nag-viral ang screen-recorded video sa aktres nga nagpadayag sa iyang simpatiya sa pagkasikop ni Duterte sa International Criminal Court (ICC) kaniadtong Marso.
Human sa backlash, nangayo og pasaylo si Etrata ug miingon nga dili na siya gusto nga open-up kalabotan sa politika tungod kini “divisive.”
Samtang, gidepensahan siya sa iyang uyoan ug handler nga si Yure, ingon man si Annette Gozon-Valdes, nga giingon nga dili siya “diehard” sa bisan kinsa nga politiko.
