Gipanghimakak ni Senate President Francis “Chiz” Escudero nga nakatabang siya sa Centerways Construction nga makadaog og mga kontrata alang sa mga proyekto sa gobyerno.
Ang Centerways Construction nahimutang sa ikapito sa listahan sa top 15 flood control project contractors nga ginganlan ni Presidente Ferdinand Marcos Jr.
Bisan og giangkon ni Escudero nga dugay na niyang higala ang tag-iya sa kompanya, giklaro niya nga dili siya kasosyo sa negosyo.
Giangkon ni Escudero nga si Lawrence Lubiano, ang presidente sa Centerways Construction, mibubo og minilyon nga pundo ngadto kaniya atol sa 2022 elections.
Base sa opisyal nga pamahayag sa mga kontribusyon ug gasto gikan sa Commission on Elections, ang maong kompanya mibubo og 30 milyones ka pesos sa kampanya ni Escudero.
Matod ni Escudero nga ang paglambigit kaniya sa isyu usa ka malisyoso nga lakang nga giingong kabahin sa demolition job batok kaniya.
Matod niya nga adunay pipila ka mga grupo nga gustong tangtangon siya sa katungdanan aron sa panahon nga mapasaka na ang impeachment complaint sa Pebrero 2026, wa na siya sa gahom—ug sa ingon matuman na ang plano sa mga pabor sa impeachment.
