Namatikdan sa Philippine Coast Guard (PCG) ang usa ka Chinese research vessel sa West Philippine Sea samtang nagpahigayon og maritime domain awareness patrol ang tropa kaniadtong Sabado.
Matud ni PCG Spokesperson for the West Philippine Sea Commodore Jay Tarriela, atol sa tunga-tunga sailang pag ronda, ilang nasigpatan ang Chinese research vessel nga Xiang Yang Hong 05 sa gilay-on nga 14.92 nautical miles gikan sa Babuyan Islands.
Matod ni Tarriela nga nagpahigayon og radio challenge ang ilang PCG aircraft apan wala motubag ang maong research vessel.
Sumala ni Tarriela, unang nisulod ang Xiang Yang Hong 05 sa exclusive economic zone sa Pilipinas kaniadtong Hunyo 7 ug nihawa kaniadtong Hunyo 9 ug nagpatigayon ug marine scientific research sa Pacific Ocean ug nisulod pag usab sa exclusive economic zone kaniadtong Hulyo 31.
Sa laing bahin, nasigpatan na usab ang maong barko kagahapon sa buntag sa gilay-on nga 86 nautical miles gikan sa Calayan Island sa Cagayan pinaagi sa Automatic Identification System (AIS).
Subling gipahayag sa PCG nga sila magpabiling mabinantayon ug magmonitor aron mapanalipdan ang maritime jurisdiction sa nasud ug mamentina ang kaluwasan ug seguridad batok sa mga langyaw nga barko nga mosalmot sa dili awtorisado ug ilegal nga mga kalihokan sa kadagatan.
