Gipasalamatan sa Department of Social Welfare and Development (DSWD) si Philippine National Police (PNP) Chief Gen. Nicolas Torre III sa donasyon nga kapin sa P16 milyon gikan sa “Boxing for a Cause: Laban sa Nasalanta” nga gipahigayon sa Rizal Memorial Coliseum sa Manila.
Matod ni DSWD Assistant Secretary ug spokesperson Irene Dumlao, ang dakong kantidad makatabang sa minilyon ka pamilya nga apektado sa habagat ug uban pang kalamidad.
Nasayran nga ang boxing match nga gipasiugdahan sa PNP ug gidaog ni Gen. Torre pinaagi sa default win, asa nakatigom og kapin sa P300,000 gikan sa entrance fee ug dugang P16 milyon gikan sa mga donasyon.
Ang kinatibuk-ang kantidad gikatakdang i-turn over sa DSWD karong semanaha.
Samtang, ang kinatibuk-ang hinabang nga gipang-apod-apod sa DSWD ngadto sa mga apektadong indibidwal ug pamilya niabot na sa P293 milyon sukad kaniadtong Hulyo 26, 2025.
