Nag isyu ang federal judge nga si US District Judge Maame Ewusi-Mensah Frimpong og temporary restraining order (TRO) sa immigration arrest sa mga ahente sa US Immigration and Customs Enforcement (ICE) sa administrasyong ni US President Donald Trump sa Los Angeles, California nga walay probable cause.
Gimanduan usab niini ang Department of Homeland Security (DHS) nga nagdumala sa ICE, nga hunongon ang pag-aresto sa mga indibidwal base lamang sa ilang lahi, pinulongan o trabaho.
Gimando usab sa US judge nga appointee ni kanhi US President Joe Biden, nga ang Department of Homeland Security maghimo og giya alang sa mga opisyal niini sa pagtino sa “reasonable suspicion” nga ilang gibase ang ilang mga pag-aresto sa lahi, pinulongan o accent sa usa ka indibidwal sa gawas sa usa ka partikular nga lokasyon sama sa paghunong sa bus o sa ilang matang sa trabaho.
Limitado usab ang ruling sa 7 county ubos sa hurisdiksyon sa US Central District sa California, lakip ang LA ug ang kasikbit nga lugar.
Ang temporaryo nga restraining order naglangkob usab sa Federal Bureau of Investigation (FBI) ug sa Justice Department, nga gilakip isip mga akusado sa kaso ug nalambigit sa pagpatuman sa imigrasyon.
Ang hukom sa federal judge natigayon human sa gipasang-at nga kaso sa Southern California batok sa administrasyon ni Trump nga nag-akusa sa DHS sa paghimo sa supak sa balaod nga pag-aresto ug pagpugong sa mga piniriso sa pagkontak sa ilang mga abogado.
