GENSAN- Temporaryo nga nagmuntar og mga tent sa Oval Plaza ning dakbayan sa Gensan si Congresswoman Shirlyn L. Bañas-Nograles sa Lone District of GenSan kay wala pa siyay opisina nga magamit.
Sa interview sa Bombo Radyo Gensan, gibutyag niini nga nagsulat siya sa Department of Public Works and Highways (DPWH) 12 og nakig-coordinate usab sa City Mayors Office aron ipahibalo ang paggamit niya sa bag-o nga Congressional Office nga nahimutang sa bag-o nga gitukod nga building tupad sa DSWD Office para sa pormal nga pagsugod sa trabaho niadtong Hunyo 30.
Gipahibalo siya sa buhatan nga karong Hulyo 15, 2025 ang turnover sa building busa dili pa kini magamit.
Nisuway siya sa paghangyo nga magbutang og pipila lang una ka mga lingkuranan ug lamesa aron mahatagan og pagtagad ang mga tawo nga moduol kaniya ilabi na niadtong nangayo og tabang apan hangtod karon wala pa siya makadawat og tubag.
Kagahapon, personal siyang nibisita sa buhatan ni Mayor Lorelie Pacquaio ug nipahibawo nga magbutang og mga tent sa Freedom Park aron temporaryong makabaton og opisina samtang maghuwat hangtod sa Hulyo 15.
Giangkon niya nga wala siya magdahom nga mahitabo kini apan iyang nakita nga hagit kini sa iyang pagserbisyo busa andam siyang moantos sa sitwasyon karon uban sa iyang mga staff.
Apan dili siya gusto nga magduda nga adunay nagpaluyo niini nga hinungdan sa mga problema sa pagsugod pa lang sa iyang pormal nga pagtuman sa mga katungdanan.
Hinuon, iyang gipasalig sa tanan nga dili kini mohunong sa iyang serbisyo ug dili usab makabalda sa ilang trabaho ang nahitabo.
Subay niini, nanawagan siya sa tanang opisyal sa dakbayan nga ipadaplin ang politika ug magtinabangay alang sa kaayohan sa katawhan sa Gensan.
