Padayon karon ang gihimong imbestigasyon sa mga otoridad kabahin sa nahitabong pagpusil patay sa usa ka babaye nga negosyante samtang nagsakay kini sa usa ka Elf nga gikan namaligya og scrap metals.
Sa pagkakaron, ginasubay na sa mga otoridad sa Bunawan ang koneksyon sa biktima sa iyahang negosyo nga junk shop.
Samtang ginasubay na usab ang mga CCTV nga nakamuntar sa dapit nga nahitabo ang pagpamusil.
Kahinumduman nga patay ang usa ka negosyante, human kini gipusil sa wala mailhing mga armadong tawo, kinsa usab giingong nagdala og kwarta nga mokabat sa ₱200,000.
Subay sa imbestigasyon nga gipagawas sa Davao City Police Office, giila ang biktima nga si MaryJoy Tanduyan 33-anyos nga taga Manalac, Panabo City, diin sakay kini sa usa ka Elf truck kauban ang iyang live-in partner nga si “Dino” nga mao ang drayber, dihang nahitabo ang krimen pasado alas 3:11 ang takna sa kaadlawon, niadtong nakalabayng adlaw.
Pag-abot niini sa daplin sa Daang Maharlika Highway, Km. 16, Holcim, Barangay Ilang, Davao City, ilang gihunong ang sakyanan human kini gipara sa duha ka sakay sa motorsiklo, nga gikaingong nagpakaaron-ingnong law enforcer tungod sa gitumbok nga traffic violation.
Samtang minaog si “Dino” aron mususi sa insidente, kalit nga miduol ang backrider sa motor sa kilid sa pasaheroan nga bahin sa elf ug gipusil si Joy nga miresulta sa iyang hinanaling kamatayon.
Human sa pagpamusil, gidala sa mga suspek ang bag sa biktima nga adunay sulod nga kuwartang mokabat sa ₱200,000, dayon misibat padulong sa wala matumbok nga direksyon.
Nahibal-an nga ang biktima gikan sa Barangay Ilang human mag-deliver og scrap metal sa usa ka pabrika sa maong lugar, ug pauli na unta kini ngadto sa ilang panimalay sa Panabo City sa dihang nahitabo ang pagpamusil.
