GENSAN – Gitangtang sa trabaho ang hapit 50 ka job order (JO) nga empleyado sa unang adlaw sa ikaduhang termino ni Mayor Lorelie Pacquiao isip alkalde sa Dakbayan sa General Santos.
Sumala ni Mayor Pacquiao, kini nga lakang mao ang unang hugna sa iyang kampanya sa pagpanglimpyo sa mga opisina sa City Hall batok sa mga pasaway ug dili epektibong mga trabahante.
Matud sa mayor, gihatagan og daghang higayon ang maong mga natangtang nga empleyado aron usbon ang ilang pamatasan ug pagtrabaho, apan wala kini nagpakita og kausaban o kalambuan.
Sa kasamtangan, kapin 4,000 ka JO employees ang sakop sa lokal nga panggamhanan sa GenSan, ug ang mga wala na mare-renew mao lamang kadtong adunay problema sa performance base sa ilang record.
Gipasalig ni Mayor Pacquiao nga padayon ang trabaho sa mga JO employee nga matinud-anon, disiplinado, ug motuman sa ilang mga tahas. Giingon niya nga wala silay angay kabalak-an basta ang ilang serbisyo kay tarong ug nagsunod sila sa mando.
Dugang pa niya, dili siya gusto nga makakita og empleyado nga maglaag-laag lang sa oras sa trabaho — sama sa pag-adto sa kan-anan, paggawas-gawas sa opisina, o paglingkod sa tindahan imbis nga nagtutok sa ilang buhat.
