Nag-andam ang Department of Agriculture (DA) og kapin sa P150 milyong kantidad sa fuel subsidy para sa mga mananagat ug mag-uuma tungod sa padayon nga pagsaka sa presyo sa krudo ug petrolyo.
Matod ni Assistant Secretary for Special Concerns and Official Development Assistance ug Agriculture Spokesperson nga si Engr. Arnel De Mesa, gikan sa maong kantidad, P75 million ang gi-apod-apod para sa mga mananagat samtang ang nahabilin para sa mga mag-uuma.
Matod niini, aduna kini espesyal nga provision sa pag-apod-apod sa fuel subsidy ubos sa General Appropriations Act, diin kinahanglan una nga moabot sa $80 per barrel ang presyo sa petrolyo una pa mahatag ang pondo ngadto sa mga benepisyaryo.
Nanawagan usab ang departamento sa mga retailers ug stakeholders sa agricultural sector nga dili unta abusohon ang pagsaka sa presyo sa krudo pinaagi sa pagpataas usab sa ilang presyo sa mga baligya nga produkto sa agrikultura.
Dugang pa niini, padayon ang ilang ahensya sa pagmonitor sa presyo sa mga palaliton kauban ang Department of Trade and Industry (DTI), aron masiguro nga walay kalit nga pagsaka sa presyo tungod sa nahitabong oil price hike sa gasolina.
Sa pagkakaron, gilauman nga magpabiling lig-on ang mga presyo sa merkado ug wala pay gilauman nga taas sa presyo, busa tambag ni De Mesa sa mga konsumidor nga bantayan ang mga presyo sa palaliton ug kabisaduhon ang hustong range niini aron malikayan ang posible nga abuso sa pipila ka mga retailers.
