Gisaway sa Palasyo ang pamahayag ni Bise Presidente Sara Duterte kalabot sa nagkataas nga utang sa Pilipinas.
Sa usa ka rally sa Australia, gikuwestiyon ni VP Sara ang kapin sa 16 trilyon nga utang sa nasud ug miingon nga ang publiko wala mobati kung asa padulong ang utang.
Matod ni Palace Press Officer Claire Castro, dili lang sa kasamtangang administrasyon nag-ugat ang utang.
Si Castro niingon nga niadtong Hunyo 2022, sa wala pa molingkod si Presidente Ferdinand Marcos Jr., ang utang nga gibilin sa administrasyong Duterte kay 12.79 trilyon.
Diin, matod niya, niabot og 6.83 trilyon ang utang sa panahon ni kanhi Presidente Rodrigo Duterte, katumbas sa 115.1% nga pagsaka kon itandi sa nangaging mga administrasyon.
Sumala sa Malacañang, paningkamotan sa gobyerno nga malikayan ang sobrang pangutang pinaagi sa pagpabakod sa ekonomiya ug tukmang pagkolekta sa buhis.
Hinuon giangkon ni Castro nga adunay mga higayon sama sa panahon sa krisis nga dili kalikayan nga nagkinahanglan og dugang pundo ang gobyerno.
