Gikompirmar sa Bureau of Internal Revenue nga gipalapdan niini ang listahan sa mga tambal nga exempted sa value added tax.
Base sa Revenue Memorandum Circular No. 62-2025 sa ahensya, gidugang sa BIR ang napulo ka dugang nga tambal sa listahan nga walay VAT.
Naglakip kini sa mga tambal alang sa kanser, diabetes, taas nga kolesterol, hypertension, ug sakit sa pangisip.
Sa usa ka pamahayag, si BIR Commissioner Romeo Lumagui Jr. niingon nga ang mga Pilipino, ilabina kadtong nag-antos sa mga sakit nga malala ug naghulga sa kinabuhi, kinahanglang makabenepisyo.
Nasayran nga ang VAT exemption gimando sa Republic Act No. 10963, o ang Tax Reform for Acceleration and Inclusion (TRAIN) Law.
Kini subay usab sa Republic Act No. 11534, o mas nailhan nga Corporate Recovery and Tax Incentives for Enterprises Act.
