Kusganong gihimakak sa House of Representatives ang pasangil nga gipasagdan niini ang San Juanico Bridge nga nagdugtong sa Samar ug Leyte.
Nahitabo kini taliwala sa binayloay sa mga pulong ni Senador Imee Marcos ug sa House of Representatives Spokesperson Atty. Princess Abante kalabot sa isyu sa San Juanico Bridge.
Matod sa Abante, sukad niadtong 2018, matag tuig na ang pundo nga gigahin alang sa rehabilitasyon sa maong tulay.
Matud ni Abante nga P27 milyones ang gigahin sa 2018; P22 milyones sa 2019; P105 milyones sa 2021, P90 milyones sa 2022; P150 milyones sa 2023; ug P400 milyones ang proposal para sa 2026.
Matod niya nga personal nga gitutokan ni House Speaker Martin Romualdez ang pag-follow up sa isyu sa San Juanico Bridge ug gitahasan si Representative Jude Acidre nga makig-estorya kang DPWH Secretary Manuel Bonoan karong Hunyo 5 aron mapadali ang mga paningkamot sa pag-ayo ug pagsusi.
Matod niya nga ang pagkalangan sa pag-ayo sa taytayan dili tungod sa kakuwang sa budget kon dili tungod sa kakulang sa pagpatuman sama sa kakuwang sa koordinasyon, contingency plans ug sayo nga aksyon sa mga ahensya.
Gitataw pa ni Abante nga giduso ni Romualdez ang pagtukod sa ikaduhang San Juanico Bridge aron dili na masubli ang maong problema.
Samtang ang tigpamaba sa Kamara mitug-an kang Senador Marcos nga “proud” siya sa pag-ingon nga gikan siya sa Leyte sa panahon sa kampanya, diin gawas sa tarpaulin ug litrato, giingong aduna usab siyay dugong Waray, apan karon nga adunay krisis, iya na lang gibasol imbes nga motabang.
Gipangutana dayon ni Abante si Marcos kung unsa gyud ang iyang kontribusyon sa San Juanico Bridge.
