Gipahayag sa Iran nga desidido silang ipadayon ang ilang panagbangi batok sa Israel human gibutyag ni U.S. President Donald Trump nga hapit na mahurot ang pasensya sa ilang nasud.
Kahinumduman nga misamot ang kasamok tali sa Iran ug Israel sa ika-unom ka adlaw sa ilang panagbangi, human usab maglusad ang Iran og hypersonic ug long-range missiles batok sa Israel.
Kini usa ka tubag sa giingon nga pagpamomba sa Israel sa internal security headquarters sa Iran nga nahimutang sa Tehran.
Sa usa ka televised address, gibutyag si Supreme Leader Ayatollah Ali Khamenei nga dili gyud mosurender ang Iran ug dili madawat ang panawagan ni Trump alang sa “unconditional surrenderr”.
Dugang pa niini, dili sila magpakita og kaluoy sa Israel. Sumala sa report sa Iranian state TV, usa ka Fattah hypersonic missiles ug uban pang super-heavy missiles ang gilusad sa Islamic Revolutionary Guard Corps.
Sa laing bahin, usa ka opisyal sa militar sa Israel ang mikumpirma nga kapin sa 400 ballistic missiles ug 1,000 ka drones na ang gilusad sa Iran sukad niadtong Biyernes.
Dul-an sa 20 ka missiles ang miigo sa mga sibilyan sa Israel.
Wala pay kasigurohan kung mosalmot ba ang Amerika sa pagbomba sa Iran, apan gibutyag ni Trump nga posibleng mag-usab ang gobyerno sa Iran tungod sa kasamok.
