Malampuson nga na-deport sa gobyerno sa Pilipinas ang duolan sa usa ka gatos ka mga Chinese ex-Philippine Offshore Gaming Operators nga mga trabahante balik sa China.
Matod sa Presidential Anti-Organized Crime Commission, gibayran sa gobyerno sa China ang ilang pamasahe aron masiguro nga dili sila makaikyas.
Sa usa ka pamahayag, si PAOCC Executive Director Undersecretary Gilbert Cruz miingon nga sa higayon nga ang mga deportees moabot sa China, sila ipailalom sa tukmang imbestigasyon.
Lakip sa mga imbestigasyon nga ilang ipahigayon mao ang ilang mga ilegal nga kalihokan sama sa scamming, cybercrime, fraud, ug money laundering, nga hugot nga gidili sa China.
Matod niya nga importante sa China ang impormasyon nga ilang makuha gikan sa mga kadagkoan sa POGO busa importante nga madawat kini sa ilang nasud.
Una nang gimando ni Presidente Ferdinand Marcos Jr. ang pagsuspenso sa tanang operasyon sa POGO sa Pilipinas niadtong Hulyo 22, 2024.
Kini nunot sa pagkadiskubre sa ilang mga ilegal nga kalihokan sa nasud sama sa torture, love scam, ug uban pang krimen.
