Gidakop sa mga awtoridad ang suspek sa pagpatay sa usa ka magbabalaod sa Minnesota ug ang pagsulay sa pagpatay sa laing magbabalaod Domingo sa gabii, Hunyo 15, oras sa US.
Ang suspek nga giilang si Vance Boelter, kasamtangang anaa sa kustodiya sa Minnesota police.
Sumala sa law enforcement official, ang 57-anyos nga suspek nagtrabaho sa usa ka security company isip direktor sa mga security patrol ug gibansay sa mga personahe gikan sa militar sa US.
Si Boelter giakusahan nga naghimo og mga targeted shootings nga nakapatay sa Democratic lawmaker nga si Melissa Hortman ug iyang bana ug nasamdan si Minnesota State Senator John Hoffman ug iyang asawa sa managlahing pagpamusil kaniadtong Sabado sa buntag.
Matod sa mga otoridad, kapin sa 400 ka tips ang ilang nadawat hinungdan nga nasikop ang suspek.
Sa sayo pa gibutyag ni Minnesota Governor Tim Walz nga ang pagpamusil sa mga magbabalaod sa estado ang “politically motivated.”
Sumala sa mga imbestigador, usa ka hit list nga adunay dul-an sa 70 ka mga ngalan ang nakit-an sa getaway car nga gigamit sa suspek, kadaghanan kanila mga Democrats o mga numero nga may kalabutan sa mga katungod sa aborsyon.
