Gikompirma sa Department of Foreign Affairs (DFA) nga labing menos upat ka mga Filipino sa Israel ang naangol ug gidali sa pagdala sa tambalanan human ang Iran nihimo og retaliatory air strike.
Matud ni DFA Undersecretary Eduardo De Vega nga ang mga naangol nga mga Pilipino gikan sa Rehovot, usa ka siyudad nga nahimutang 20 kilometros habagatan sa Tel Aviv.
Gawas kanila, 12 pa ka mga Pinoy ang didto sa usa ka parke dihang naigo ang Iranian missile sa maong lugar.
Samtang, usa ka Pinay usab ang nakahikling ug temporaryong nagpuyo sa usa ka hotel human ang mga missile miigo sa Ramat Gan, kasadpan sa Tel Aviv, sumala sa Philippine Embassy sa Israel.
Matud ni De Vega nga gitun-an sa embahada kung gikinahanglan ba nga ipatuman ang boluntaryo o pinugos nga pagpauli sa mga Pilipino sa umaabot nga mga adlaw.
Matod niya nga gisusi usab sa Pilipinas ang posibilidad sa pagpabakwit kanila gikan sa Israel pinaagi sa Allenby Bridge paingon sa Jordan kon mograbe pa ang tensyon tali sa Israel ug Iran.
