Namahayag ang assistant to counsel sa International Criminal Court (ICC) nga si Kristina Conti nga ang mga tingog sa giingong mga biktima sa drug war ni kanhi Presidente Rodrigo Duterte kinahanglang madungog sa dili pa siya hatagan og interim release.
Ang kampo sa kanhi presidente mihangyo nga hatagan siyag interim nga kagawasan, nga kon maaprobahan motugot siya nga temporaryong mobiya sa detention facility sa ICC ngadto sa wala matino nga nasod.
Gikompirmar usab sa ICC prosecutor ang ilang ‘non-opposition’ sa hangyo sa kanhi presidente.
Giinsister ni Atty. Conti nga ang panglantaw sa mga biktima susama ka importante sa kaugalingong perspektibo sa defense ug prosecution team, mao nga kinahanglang madungog una kini sa international tribunal.
Gisaway usab sa abogado ang pangangkon sa defense team nga nakigsulti na sila sa prosekusyon ug sa representante sa usa ka nasud nga pabor sa pagpasilong sa kanhi presidente sa higayon nga mahatag ang hangyo alang sa interim request.
Matod ni Conti, kinahanglan una nga kumpirmahon kini sa ICC tungod ang ingon nga mga pahayag nagsilbi sa kaugalingon, ug wala’y kasiguruhan kung kini tinuod nga gihimo.
Ang abogado nihangyo nga mahatagan og kahigayonan ang mga biktima sa drug war nga iyang girepresentahan nga makatug-an sa mga rason sa ilang pagsupak sa maong lakang.
Bisan pa niini, gipasalig ni Conti nga bisan og posibleng mahatag ang hangyo sa kampo ni Duterte alang sa interim release, wala kini magpasabot nga gawasnon na siya hangtod sa hangtod tungod kay istrikto gihapon ang ICC sa iyang mga aksyon sama sa pakighinabi sa mga tigbalita.
