Nagpadayon ang pagpangita sa black box sa nahagsa nga Air India plane sa Ahmedabad, India.
Anaa usab ang mga forensic expert sa crash site aron magtigom og mga ebidensya nga may kalabutan sa aksidente.
Kaniadtong Huwebes sa gabii, gipahibalo sa India ang pag-abli sa usa ka pormal nga imbestigasyon sa pagkahagsa sa Air India.
Ang Aircraft Accident Investigation Bureau ang nanguna sa imbestigasyon. Ang Estados Unidos ug United Kingdom nagpadala sa ilang mga eksperto nga grupo aron motabang sa imbestigasyon sa pagkahagsa sa erplano.
Samtang, ang Prime mInister sa India nga si Narendra Modi personal nga miadto sa crash site sa Ahmedabad ug mibisita sa nag-inusarang naluwas sa makalilisang nga trahedya, usa ka British national, si Vishwashkumar Ramesh, nga karon nagpaayo sa ospital, blangko ug dili makatuo kung giunsa niya milagrosong naluwas ang insidente.
Kahinumduman nga usa ra ka tawo ang naluwas gikan sa 242 ka mga tawo nga sakay sa eroplano human kini nahagsa sa usa ka residential area wala madugay human sa pag-takeoff niadtong Huwebes.
Matod sa Air India, adunay 169 ka Indian national, 53 ka Briton, 7 ka Portuguese national ug usa ka Canadian ang sakay sa eroplano dihang nahagsa ang eroplano.
Gikumpirma sa usa ka senior nga opisyal sa kahimsog sa Ahmedabad nga walo ka mga tawo ang namatay sa yuta diin ang eroplano nahagsa, upat niini mga estudyante sa medisina samtang ang laing upat mga paryente sa ubang mga estudyante nga nagpuyo sa usa ka hostel.
Sa laing bahin, ang mga pamilya sa mga biktima nagpadayon sa paghatag og DNA samples aron makatabang sa pag-ila sa ilang namatay nga mga sakop sa pamilya.
