Gipasabot sa Duterte Youth party-list niadtong Biyernes nga ang paggamit og lain nga apelyido sa unang nominado niini, si Drixie Mae Suarez-Cardema, alang sa “name recall” o sayon nga pag-ila sa politika.
Matod ni Ronald Cardema, chairperson sa Duterte Youth ug bana ni kanhi representante Ducielle Marie Suarez-Cardema, igsuon ni Drixie nga si Ducielle, sagad sa mga magbabalaod mogamit og politikanhong ngalan sa pagsugod sa Kongreso.
Ang party-list gisaway sa social media human namatikdan nga lahi ang apelyido ni Drixie sa iyang Certificate of Nomination (CONA), diin giingong gigamit niya ang apelyido nga “Cardema” imbes sa tinuod niyang apelyido nga “Suarez.”
Matud ni Commission on Election (Comelec) Chairman George Garcia nga ang iyang Law Department mopagawas og show cause order aron imbestigahon ang paggamit og lain nga apelyido, apan iyang giklaro nga wala kini magpasabot nga adunay kaso sa disqualification o election offense.
Dugang pa ni Garcia nga tan-awon sa Comelec ang mga dokumento nga gisumite ni Drixie alang sa 2025 midterm elections, ingon man ang iyang mga naunang record.
Kahinumdoman nga ang Duterte Youth maoy ikaduha sa party-list race sa 2025 Elections human nakakuha og 2.3 million votes. Hinuon, gi-postpone sa Comelec ang ilang pormal nga proklamasyon tungod sa pending nga mga isyu.
