Gikatakdang moatubang pag usab si kanhi Negros Oriental Representative Arnolfo ‘Arnie’ Teves Jr. sa korte sa mga kaso nga iyang giatubang sukad sa iyang pagkasikop ug pagbalik sa nasud.
Ang iyang sunod nga arraignment gikatakda sa sunod semana, Hunyo 10 ning tuiga.
Kini ang gikumpirma ug giklaro sa iyang abogado nga si Atty. Ferdinand Topacio, kinsa nipahibalo sa ilang kaandam modepensa sa iyang kliyente batok sa mga pasangil nga nalambigit.
Ang bag-ong eskedyul sa pagdungog sa kaso sa kanhi kongresista ipahigayon sa Manila Regional Trial Court Branch 51 sa alas 2 sa hapon.
Gilauman nga mao kini ang labot sa kaso nga naglambigit ni Arnie Teves Jr. sa kasong pagpatay nga nahitabo ni kanhi Negros Oriental Governor Roel Degamo ug uban pang mga biktima niadtong 2023.
Busa, gipahibalo sa iyang legal counsel nga tumanon nila ang gusto sa korte kon momando kini sa kanhi kongresista nga mopatim-aw sa personal.
Kahinumduman nga karong bag-o, adunay mosyon ang ilang kampo nga tambungan lang ang iyang mga arraignment pinaagi sa video conference.
Matod nila alang kini sa kaayohan sa ilang kliyente ilabi na sa iyang seguridad ug kaluwasan.
Dugang pa ni Atty. Ferdinand Topacio nga ang maong matang sa pagtambong dili gidili ug mahimong tugotan sa korte kon gusto niini.
Samtang sa bag-ong report kalabot niini, gikompirma ni National Bureau of Investigation Chief Jaime B. Santiago nga dili na pisikal nga magpakita ang kanhi kongresista.
Hinuon, nakatakda siyang motambong sa sunod nga pagdungog sa iyang mga kaso pinaagi lamang sa video conference.
Busa, gipaabot nga mopresenta gihapon siya sa pagbasa sa arraignment karong Martes, Hunyo 10, 2025.
