Gipasiugda sa mga lider sa tri-committee sa House of Representatives ang panginahanglan sa balaod aron mabatukan ang makadaot nga peke nga balita ug propaganda sa social media.
Atol sa usa ka pagdungog niadtong Huwebes, si Santa Rosa City Rep. Dan Fernandez nipasidaan nga ang sayop nga impormasyon gigamit sa pag-atake sa soberanya sa nasud ug pagpabor sa ubang mga nasud sama sa China.
Ang makapasubo kay adunay mga Filipino vloggers ug influencers nga mitabang sa pagpakatap sa narrative sa China.
Si Fernandez niingon nga ang hiniusang komite mopagawas og report nga adunay konkretong rekomendasyon aron masumpo ang maong hulga.
Matod ni Agusan del Norte Rep. Jose Aquino II, chairperson sa House Committee on Public Information, ang pagkuyanap sa sayop nga impormasyon online usa ka problema nga nagbunga ug uban pang problema.
Gipasiugda usab ni Aquino ang panginahanglan sa pagpalig-on sa mga programa sa digital literacy, ilabi na sa mga kabatan-onan.
Si Surigao del Sur Rep. Johnny Pimentel, vice chairperson sa House Committee on Information and Communications Technology, niawhag sa iyang mga kauban nga ipunting ang ilang atensyon sa mga solusyon aron mahimong himsog ang palibot sa impormasyon sa nasud.
Gitapos sa tri-committee ang pagdungog sa pagkaylap sa fake news karong Huwebes ug gipaabot nga ipagawas ang committee report niini sa dili pa mo-adjourn ang session karong Hunyo 11.
