Nagpahibalo ang Department of Tourism nga nagsugod na sa pagbangon ang Pilipinas gikan sa pagkunhod sa gidaghanon sa mga turistang Chinese nga mosulod sa nasod, inubanan sa pagsaka sa mga turista gikan sa ubang kanasuran, ilabina gikan sa Middle East, Gulf Cooperation Council (GCC), ug India.
Matod ni DOT Secretary Christina Garcia-Frasco, ang target nga 7.7 milyones nga Chinese tourist arrivals alang sa 2024 wala matuman, human nga nakatala lang og 5.9 milyones sa miaging tuig. Usa sa mga rason nga giimbestigahan mao ang pagsumpo sa Philippine Offshore Gaming Operators (POGOs).
Agig tubag, ang DOT nagpasiugda sa diversification sa mga merkado sa turismo. Giingon nga 500% hangtod 800% nga pag-uswag sa mga turista nga nangabot gikan sa Middle East ug GCC ang nakita, tungod sa mga lakang nga nagtubag sa Halal ug Muslim-friendly nga turismo, sama sa Marhaba Cove sa Boracay ug akreditasyon sa mga Muslim-friendly nga mga hotel ug restawran.
Ang DOT nagpalig-on usab sa relasyon sa mga dagkong merkado sa turismo sama sa South Korea, Japan, United States, Europe, ug Australia. Ang gidaghanon sa mga bisita gikan sa South Korea ug Australia nagpadayon sa pagdugang tungod sa pagpalapad sa koneksyon ug interes sa diving, golf, beach, ug adventure turismo.
Dugang ni Frasco nga andam ang nagkadaiyang destinasyon sa nasud nga modawat og mga turista gikan sa lain-laing dapit sa kalibotan.
