Nihinay ngadto sa 1.8% ang inflation rate o ang lebel sa pagsaka sa presyo sa mga palaliton sa nasud sa buwan sa Marso sumala sa Philippine Statistics Authority (PSA). Sa usa ka press conference gitaho ni PSA USec.
Dennis Mapa nga ang hinay nga inflation rate sa miaging buwan nag-una tungod sa hinay nga pagsaka sa presyo sa mga pagkaon ug ilimnon ingon man ang pagtidlom sa presyo sa lana sa nahisgutang buwan.
Partikular nga gitumbok sa opisyal ang dakong pag-us-os sa presyo sa bugas niadtong Marso kumpara sa samang buwan niadtong 2024 nga nakatala og year-on-year nga pagkunhod sa -7.7% niadtong Marso.
Matod niya nga kini ang labing dako nga porsiyento sa pagtidlom sa presyo sukad niadtong Marso 2020 diin mius-os ang presyo sa bugas ngadto sa -8.4%.
Samtang, gawas sa presyo sa bugas, mius-os usab ang presyo sa mga karne ngadto sa 8.2% niadtong Marso gikan sa 8.8% niadtong Pebrero.
Bisan pa nga giangkon sa opisyal nga nagpabiling taas ang presyo sa mga meat products tungod sa epekto sa African Swine fever (ASF).
Sa gasto sa transportasyon, niubos kini tungod sa gipatuman nga rollbacks.
Sa kinatibuk-ang average inflation gikan sa Enero hangtod Marso sa kasamtangang tuig, natala kini sa 2.2% nga nagpabilin sulod sa target range sa gobyerno nga 2% ngadto sa 4%.
