Misurrender ang pito ka Indonesian Philippine Offshore Gaming Operator (POGO) nga mga trabahante sa Presidential Anti-Organized Crime Commission (PAOCC).
Matud ni PAOCC Executive Director ug Undersecretary Gilbert Cruz nga ni-surrender sila tungod gikansela ang ilang mga work visa ug nahurot na ang ilang kuwarta sukad gipahunong sa gobyerno ang operasyon sa POGO sa nasud.
Dugang pa sa opisyal nga ang mga mi-surrender naglakip sa lima ka mga lalaki ug duha ka mga babaye nga tagsa-tagsa mitago samtang gipasirad-an sa gobyerno ang mga POGO.
Matod pa niya nga ang ilang mga lugar nga ilang gitrabahoan namalhin gikan sa Pasay City, Paranaque, Makati ug sa Cavite diin nalambigit usab sila sa mga scam.
Sa pagkakaron anaa sila sa kustodiya sa PAOCC ug ipaubos sa debriefing una pa dad-on sa Bureau of Immigration alang sa profiling.
Ang PAOCC nakigkontak usab sa Indonesian Embassy sa Pilipinas alang sa ilang pagpauli.
