Nagpasalig ang Philippine Health Insurance (Philhealth) sa publiko nga abli sa katawhan ang access sa dengue coverage gumikan sa padayong pagsaka sa kaso sa dengue gikan sa nagkadaiyang dapit sa nasud.
Matud ni PhilHealth Senior Vice President for Health Finance Policy Sector Israel Francis Pargas, adunay tulo ka package nga mapilian sa mga biktima sa dengue.
Gipasabot ni Pargas nga ang una mao ang primary care benefit o Konsulta, nga mao ang service provider sa Philhealth diin kadtong makasinati og sintomas sa dengue mahimong magpa-check up nga libre ug walay bayad.
Lakip sa package ang mga laboratory tests nga makuha nga libre sa Konsulta provider.
Ang ikaduha nga packages kung ang pasyente ang gidala sa emergency room gumikan sa mga sintomas sa dengue apan dili kinahanglan nga admit sa ospital, nga makadawat og compensation ang mga pasyente ilawom sa outpatient emergency care package.
Ang ulahing package ang alang sa mga admitted patient nga may diagnosis nga dengue nga makadawat og benepisyo nga P19,500 nga compensation og kung grabe ang pasyente makadawat og P47,000 nga Philhealth package.
