Nangandam na ang Thailand human napili nga mag-host sa 2025 nga edisyon sa Miss Universe. Gianunsyo sa Miss Universe Organization human giluwatan ang teaser nga napili usab ang Spain, Costa Rica, Nigeria, Dominican Republic, South Africa, ug Pilipinas.
Kini ang ikaupat nga higayon nga ang “The Land of Smiles” mo-host ning global pageant.
Kini usab ang yutang natawhan sa usa sa mga co-owners sa MUO, si Anne Jakrajutatip sa JKN Global Group. Tuig 2018 maoy katapusang higayon nga ang Thailand nag-host sa Miss Universe competition diin si Catriona Gray sa Pilipinas maoy nakoronahan.
Sa miaging tuig, ang pageant gihimo sa Mexico, nga mao ang yutang natawhan sa laing MUO co-owner, si Raul Rocha sa Legacy Holdings Group, kinsa nakakuha sa katunga sa organisasyon sa miaging tuig.
Sa pagkakaron, nagpadayon pa ang pagpangita sa delegado sa Miss Universe Philippines ug hapit na makompleto ang listahan sa mga kandidato.
Lakip sa mga bag-ong nadugang mao ang OG Latina slayer, ang beauty-queen actress nga si Winwyn Marquez nga maoy morepresentar sa Muntinlupa City. 32-anyos na si Winwyn ug dunay duha ka tuig nga anak nga babaye apan naa pa sa pageant tungod kay wala nay restrictions nga gihatag sa organisasyon.
Nadaog niya ang titulo sa Reina Hispanoamericana kaniadtong 2017 ug mao usab ang una nga babaye sa Asya nga nakadaog sa duha nga dibisyon. Magtigi usab ang beterano sa pageant sa Taguig City nga si Katrina Llegado. Kaniadto siya nirepresentar sa Taguig sa Miss Universe Philippines 2022 ug nirepresentar usab sa Pilipinas sa Reina Hispanoamerica 2019 diin siya mitapos isip fifth runner-up.
Sa miaging tuig, ang representante sa Pilipinas mao si Chelsea Manalo nga nasulod sa Top 30, nahimong unang nakadawat sa titulo sa Miss Universe Asia, ug nakadawat usab sa Best in National Costume award.
