Gi-aprubahan na sa Kamara sa ikatulo ug uwahing pagbasa ang House Bill 11317 o sugyot nga pahamtangan ug ₱500,000 nga multa ang mga mahukman nga “guilty” sa pagiging “nuisance candidate” o mga panggulo nga kandidato sa matag eleksyon.
193 ang mga kongresista nga miboto pabor sa sugyot ug upat usab ang mikontra.
Tumong sa sugyot nga maproteksyunan ang intergridad sa election sa nasud batok sa mga nagduso ug certificate of candidacy (COC) nga dili seryoso sa pagdagan o nagsinamok lamang sa electoral process.
Gitakda sa sugyot ang pag-amyenda sa Omnibus Election Code of the Philippines o Batas Pambansa 881 aron nga palapdan pa ang depinisyon sa nuisance candidates ug iapil ang mga nagduso ug COC para mukita o modawat ug uban pang konsiderasyon.
Sa kasamtangang balaod, bugtong ang pagdiskwalipika lamang ang aksyon batok sa mga gideklarang nuisance candidates pero walay gipahamtang nga silot para kanila.
