Nagatuo ang duha kia kanhi commissioner sa Bureau of Customs (BOC) nga panahon na aron wagtangon ang Tara systems sa ahensiya.
Kini ang gibutyag ni kanhi Customs Commissioners Nicanor Faeldon ug Isidro Lapena sa pag-padayon sa pagdungog sa Quad Committee.
Matud kang Manila Rep. Bienvenido Abante nga dako ang pasakit sa katawhan ang tara system.
Gipakita sa kongresista ang pagpalusot sa mga smuggled nga palaliton nga maoy nakapamahal sa mga palaliton susama sa bugas.
Sa managlahing interpelasyon ni House Deputy Minority Leader France Castro, sila si Faeldon ug Lapena miangkon nga bisan pa sa ilang mga paningkamot pagdaot sa tara system, naglisod sila pagkuha og suporta gikan sa mga importer.
Matod ni Faeldon nga iyang gisumiter ngadto sa 12,000 ka importers ug brokers ang listahan sa customs officials nga midawat sa bill of lading, apan hangtod karon, matud niya wala pay nakaduso niini.
Gi-delist usab niya ang kapin sa 4,000 ka mga importer ug broker. Apan basta walay importer o broker nga motestigo, maglisod sila paggukod sa mga nalambigit sa tara system.
Si Castro nisugyot nga mohimo og buy-bust operation ang customs aron masikop ang mga nalambigit sa tara.
Paambit ni Lapena nga ila na kining gihimo kaniadto, apan sa kataposang gutlo kalit lang nga mi-backout ang importer kay matod niya basin maapektuhan ang iyang negosyo.
