Makapaalarma ug dili husto ang mga pamahayag ni Bise Presidente Sara Duterte nga nikontrata kini og assassin aron patyon si Presidente Ferdinand Marcos Jr kung gani adunay mahitabo nga dili mayo kaniya.
Matod ni Escudero, isip ikaduhang labing taas nga opisyal sa nasud, kanunay niyang hinumdoman nga aduna siyay katungdanan nga mahimong ehemplo sa iyang mga kawani sa Office of the Vice President (OVP), sa mga Pilipino, ug sa mga batan-on.
Nanawagan usab si Escudero sa mga kaalyado ni Duterte nga tambagan ang bise presidente nga dili mobuhi og dautang pulong, nunot sa iyang “kill order” ngadto sa presidente, First Lady Liza Araneta-Marcos, ug House Speaker Martin Romualdez.
Apan, giklaro ni VP Sara Duterte nga bisan sa wala pa siya moingon nga nakigsulti siya sa usa ka tawo nga manimalos o mopatay ni Presidente Ferdinand ‘Bongbong’ Marcos, First Lady Liza Marcos ug House Speaker Martin Romualdez, siya mismo nakadawat na og mga hulga sa iyang kinabuhi.
Mao nga gipahimug-atan sa Bise Presidente nga “kung” mamatay siya, nasayod na siya kung kinsa ang mobuhat niini.
Gipaabot usab sa Presidente sa Senado nga mangayo og propesyonal nga tabang si Duterte kung naglisud siya aron makatuman sa iyang katungdanan isip bise presidente.
Gitataw sa senador, ang atensyon ug kusog sa mga opisyal sa publiko nga kinahanglang itutok sa pagsulbad sa mga problema nga giatubang sa nasud.
Hinuon, nihangyo kini kang VP Sara nga repasohon ang iyang mga pamahayag ug aksyon batok sa administrasyon.
Ang mga pamahayag ni Duterte nahitabo human ang iyang chief of staff nga si Undersecretary Zuleika Lopez, gimando nga ibalhin gikan sa House detention facility ngadto sa Correctional Institution for Women sa Mandaluyong City.
Si Duterte miingon nga ang plano sa pagbalhin usa ka “attempted homicide.”
